L guaranà ie na planta che crësc tl’Amazonia y à na sustanza che à la medema fazion sciche la cofeina

La Paullinia cupana coche n ti dij per latin ie na planta dla familia dla Sapindaceae. L guaranà à laite la guaranina, na sustanza che à la medema fazion sciche la coffeina. La planta guaranà crësc su per d’autri lëns y po’ nsci arjonjer n’autëza de 13 metri. La planta che vën zidleda per la ndustria, dantaldut ti chemuns de Maués y Urucarà, doi luesc sun l Rio dl Amazonia, ie scialdi mëndra y arjonj mé doi o trëi metri d’autëza, acioche n posse tlupé la sumënzes plu saurì. I ciofs dl guaranà ie blanc y i fruc ie ntëurvia cueceni y dedite blanc. Amez iel na sumënza foscia.

La fazion dl guaranà

I Indios criova bele da vedlamënter che l guaranà fosse n elisir per la vita longia, ajache l fova na spëisa ma nce n frut per varì la malaties. L guaranà univa tëut per stimulé l organism y per miuré la rejistënza fisica. Ëi criova che l frut a forma de uedl ti jude a udëi y audì miec ntan la ciacia. N valgun populi tulova chësta planta nce contra la schita y l mel ntan la mestruazion.

Coche ntlëuta iel nce al didancuei plu variantes dla preparazion, ma n generel pòssen dì che l vën n iede tlupà i fruc che se à mesanmënter giaurì, pona i mëten tl’ega frëida per tò ora la sumënzes y ala fin i praten ju sun n pitl fuech y i schicia ora. Ntan che n i schicia jonten mo leprò mpue’ d’ega, nchin che l vën a se dé na bela pasta. Chësta fejen ju a forma de paniotes y les mët al surëdl. Ala fin dla finedes mëten ch’sta paniotes mo n iede dlongia l fuech fat cun rames da reja. La paniota vën pona crazeda sciche n tòch de parmesan canche n adrova energia. L guaranà vën al didancuei nce tëut per fé na buanda puech gaseda dal inuem guaranà. L culëur y la sëur mpue’ dëucia ti semea ala buanda dla cola. Nce la fazion de stimulé ie la medema. Coche plu dagiut vën l guaranà nce tëut coche medejina y n l giapa al didancuei tla forma de tabletes, de pitli fusć o tla forma de polver.

Autora

Sofia Stuflesser
Culaboradeura

ie nasciuda ai 26.07.1994 a Persenon. Do la scola mesana àla fat l lyzeum de rujnedes a Bulsan. Tl mumënt studieiela storia, storia dl'ert y biologia tla Università de Dispruch. La à laurà doi d'insteies pra la Usc di Ladins y scrij for inò articuli per la lies, per la butëiga dl mond y de zënza vel’ manifestazions.