Canche son mingol ju de spirit me vegn estro de vèlch che me soscedee da ite, vèlch che me dae indò mingol de gaissa. E chest vèlch l’é n vin sprizent... apontin, l CHAMPAGNE.
Ades cogne stèr n muie ascorta, ajache te la Tèlia aon vins sprizenc n muie bogn, ence e soraldut tel Trentin. Chisc vegn ence paragoné al CHAMPAGNE, ma, cherdeme, no l’é la valiva roba, perché la vignes cresc su terens desvalives (tel Trentin aon una sort de teren e te la region del Champagne n Franzia n auter), donca l’é doi prodoc che no podon meter a confront. I é desferenc, ence se i vegn njigné à la medema vida.
Ja l’inom … “CHAMPAGNE “, l me rodolea te bocia coscì bel! Dir … “SPUMANTE “ no l’é la medema sensazion. E ajache inché l’é un de chi dis senestres, se n verjon una bòcia, e do ve contaré ence zeche de più. Spere che l sie ja al fresch. Chest vin sprizent no cogn aer più de 7-8 gradi. Tire via chel picol gabiot ntorn la bòcola, tole semper l manipol, tegne la bòcia mingol de sbiech, e la ouje pian pian. Col vin chécen aee dit de osservèr e fèr pian. Con chest, dipende: se verje la bòcia per lurier, dedant a ghèsc, fae pian e no cogn me sciampèr la bòcola, ma se la verje per na festa anter amisc, lasce ben che la vae, con un bel “schioc!”. Se sà ben che no la ouje proprio envers na persona o na fonestra, che chela canche la pèrt no la sgherza, ma la dreze olache no la pel fèr dan e lasce che l CHAMPAGNE vegne fora con dut sie swung desche se l dijessa: “Zacan al luster, fora da ‘sta bòcia!“. Anter l’auter la bòces les vegn semper tegnudes al scur, l vierech l’é n muie spes (per via de la prescion, les con tegnir fin a 10 atmosferes) l’é desche de picola prejons, te cèvena amancol 3 egn e coscita capide che canche zacan l vin pel fora, de sbalz, sprizent, chest bel color biondo l’é na festa per el e per nos!!! Se n rua mingol sun tapé, no ve cruzià, no l fèsc nia ve! Svete coran te i biceres, (de chi lenc o a copa), che nia vae perdù, e vèrde encantesimèda l “perlage “ che l’é te chela picola boles che vegn su te l bicer, dò e dò, sgalizentes, fines, no les lascia vea, somea che les ciciolee, e aldò del dì, entene enscinamai chel che les disc!
Col CHAMPAGNE no se con mai oujer l bicer, l’é ja chela picola boles che mef. Jon inant: porte l bicer vejin al nès e sente l gherm, l smauz, mingol de persech, un parfum muie muie fin e delicat. L cèrce e l sente te ogne pèrt de la bocia, desche n velù. L CHAMPAGNE no l’à mai nia de agressif. E sobito me vegn estro de n beiver amò mingol, (ma mingol!), e pian pian ence mie spirit se viventea desche chela picoles boles.
Tel 2001 son stata n Franzia, a EPERNAY, la patria del CHAMPAGNE. Aon abù la fortuna de vijitèr cèses de nonzech. No ve die la cèvenes… lenges chilometres, scures, pienes de rainèdes, na picola lum cà e là, l fon de saulon, duta chesta bòces enlengia ai pareés e su la “PEUPITRES “, che fossa na sort de trespoi olache la bòces les vegn metudes col col n ju, e les vegn utèdes a man, ogne dì de n chèrt. L ven chiamà “REMUAGE“. E dut chest per fèr ruèr i deposjic del vin tel col de la bòcia, che vegnerà passà tel azot per se giacèr. E con n colp sech! chest depojit vegn eliminà te n bòt e sorì. Chesta cèvenes les à zeche de misterious, de fon, n odor particolèr, desche na magìa. Dapò se vegn su te chesta beles e rencurèdes majons olache i ne fèsc ciarcèr chest renomà CHAMPAGNE, e i ne lo descrif a na vida che se resta a bocia averta. Per me l’é stat na rivelazion! E ve die amò che la region Champagne (nord-est de la Franzia ) no la é bela, l’é n gran vent, odia, se veit demò vignes e vignes, n muie basses, coscita les ciapa l calor del soreie e les se defen dal vent. L teren l’é ciuciaa e sès. No aesse mai dit che te chest contest vegnisse fora n vin coscì spezièl. Me vegnìa tel cef l Piz Boè: sasc daperdut, ma fora de n bel nia te veides na magìa de picoi fiores sai, brugn: n miracol. E coscì ence l CHAMPAGNE .
E ge rengraziaré semper chel abat Benedetin, DOM PIERRE PERIGNON, che entorn al 1670, per un fal de fermentazion l’à nventà chest vin, cognosciù te dut l mond! Podesse ve conter amò trop, ma no voi esser no massa lengia, no massa “tecnica”. Posse amò ve dir coran che per fèr chest vin ge vel semper e demò PINOT NEIGHER , PINOT MEUNIERE, CHERDONNAY. La ua la vegn regoeta duta a man. Se pel chiamèr CHAMPAGNE demò l vin fat te la region del Champagne. Te la Tèlia cognon dir “Metodo classico”, ence se l vegn fat col medemo prozediment. Te la autra regions de la Franzia se chiama “CREMANT “. La bòcia de Champagne se pel verjer ence cola ‘sabia (n muie bel...)
La majon “ROEDERER” la esportea la bòces de crèstel, no demò vierech, e les ruèa nfin n Ruscia a la cort de i zar. Fossa amò curiositèdes , ma me peisse che per inché lascion vea. Se pel amò jir de retorn su chest argoment, semper che ve fae piajer!

Autora

Marika Detone
colaboradora

Son nasciuda ai 7 de mé, an 1947. Mie mestier l’é stat chel de lurèr coi ghesc', ades son n pension. Me à semper sapù bel lejer, viajèr, jir sa mont e dut chel che à a che fèr col vin. Son maridèda con Nereo, no aon fies ma sion n muie taché ai nec. Me à semper sapù bel e son semper stata ben con mia familia.... >>