Tan de edizions de aterteater iel pa bele stat?

aterteater é ruvé ala 6. ediziun, y al é nasciü tl 2010 da na idea de Erika Castlunger, Valentina Kastlunger, Barbara Tavella, Ursula Tavella e Bernardetta Nagler. Nos cinch laurun dötes tl ciamp dl teater y dl'ert, y i un ince bele denant lauré adöm, y le festival aterteater é insciö nasciü dantadöt por nosta pasciun y por nosta vöia da porté tla Val Badia n teater inovatif, che sides n'esperiënza sterscia y particolara por le publich. Ci che i chiriun é n teater, che respidlëia la porsona y la sozieté te düc sü aspec, y che chir n lian ince cun les atres formes artisiches: musiga, bal, ert figurativa, performance, mesi multimediai.

Can meteis’a man cun la urganisazion uni ann?

L'organisaziun, o plü avisa le cöie adüm idees por l'ann che vëgn, metunse bele man tratan le festival. Spo se incuntunse da setëmber inant, olache i metun adöm nostes idees, i ciarun ci che al vëgn pité te atri festivals europei, i fajun plü enrescides te internet. Spo de otober, novëmber metunse man de contaté i grups por odëi sce ai é interesciá da gní a nosc festival. A ci che i ti dun ince dër tröpa importanza é le post ulà mostré i teatri/performance: i ciarun da nia jí ti salf de manifestaziuns, mo i ciarun da porté le teater amesa la jënt, sciöche por ejëmpl te plaza de paisc, por les strades, te ateliers de artisc, tles zones artejanales, te stües, te ostaries. Y spo él sambagn ince da ponsè da ciafé i finanziamënc y da fá insciö les domandes por i contribuc.

Ce pez cunseies’a de udei assolutamenter?

Por chësc ann unse ponsé da avëi scialdi performance solo por nosc festival, y ci che iö consiëi da odëi é döt :), deache vigni performance é particolara y mostra ince na magia y na poesia, che plej dessigü a tröc.

Ciuldì dessen pa jì a teater y ciuldì dessen pa jì a l teater dla Val Badia?

Le teater é por me n'atra forma de comunicaziun, nia ma na comunicaziun danter le artist y le spetadú, mo al é dantadöt na comunicaziun cun nosc instësc. Le teater funzionëia, canche al é bugn da möie val' tla porsona, che ne mëss nia tres ester val de bel y de positiv. Canche do n teater se fejun pinsiers sura la porsona y so ester, spo él n bun teater. Teater ne dessun nia ma jí tla Val Badia a ciaré, mo indlunch, mo sce i gnëis chësc isté tla Val Badia al festival aterteater, spo sunse sambagn dër dër cuntëntes.