Ge vel semper jir sorafora se enstesc, no se encontentèr mai e se lascèr maraveèr“

Chest l’é l spirit de gaissa e endesfida de Samantha Pederiva che con coraje e determinazion à chierì n troi nef te si vita jian dò si pascion: la musega

„Mia vita la é scomenzèda de 30 egn ajache dò aer fat i studies de giurisprudenza, endèna la pratica me n’é adat che no l’era mia strèda, gio é semper cerì n lurier che me dae l met de star con la jent e aer stimoi semper neves. Enlouta é scomenzà a studiar musega, é dezidù de jir dò a mia pascion che l’é la musega. Ades laore te n azienda olache é l met de me confrontèr con tropa persones che se cruzia de argomenc desvalives e dò vea vae a fèr conzerc“.

Con chesta paroles Samantha Pederiva conta en curt co e perché l’à dezidù de ciapèr te man si vita e ge dèr na outa a n troi che era béleche valivà fora. Chesta sia dezijion ge à avert etres ujes ence sul lurier ajache aldidanché vegn domanà no demò profescionalità su un aspet ma soraldut interdisciplinarietà e capazità de se relazionèr co la jent, l’esser jita dò si pascion la la deida a aer vijions più granes, desvalives e avertes. Portèr zeche de personal, esperienzes o stìmoi neves sul lurier l’é chel „quid pluris“ che deida a saer veder te n problem n ocajion, te na cianzon n stìmol per aer autra vijions e deida soraldut a costruir n tochet nef de se enstesc. Tel stèr dò a si familia, si lurier e si pascion Samantha à troà na gaissa de viver che dant no la cognoscea. L’endesfida e la marevea l’é l motor de si vita e la temes che l’aea dant, cheles de no esser bona de se sentir realisèda tel lurier o te sia pascion, se à desfantà ajache l’à entenù che tel vardèr da n autra man o dintorn l’é ence più che na soluzion. La temes l’é stat la sburla per se meter en discuscion e der na outa a si vita.

So consei ai joegn l’é chel de jir dò a si pascions, a chel che ge piesc fèr e dèr valor a duta la esperienzes fora de la scola e del lurier ajache cheles deida a svelupèr la personalità, a crescer e pissèr con so cef con sens critich. Dut chest deida a viver miec e costruir adum n mond mior.

Autora

Anna Mazzel
Redadora

Mi inom é Anna Mazzel, son nasciuda a Cianacei e vive anter Fascia e Busan. E' studià scienzes politiches, fat n master su la istituzions europees, un su la mediazion di conflic e na gran scola de vita tres i tropes viajes che é fat da l'Africa a l'Asia, Brasil, Nicaragua, Salvador e Guatemala e duc chi che amò à da vegnir. Laore desche programmista regista te la... >>