Tel teater nef del comun de Busan chisc dis cianta Laura Catrani, soprana con la pascion de la musega contemporanea. Paconta da egn con Matteo Franceschini, compojidor trentin enciasà a Paris che à njigna ca l’opera, Laura la se à dat ju con chest toch zis particolèr, de efet e emozionant, che l tocia duc i sensc, enscinamai l gust. Defati, endèna che se scouta la contìa e se se lascia encantèr da la musega, se tasta l magnèr da saores del bosch (per chesta rejona se disc “food opera”) e te n moment se se troa te n stat che zacan ne é fosc ence partegnù. Coscita che ne sa de esser proprio nos alò, te chela radura del bosch, dessema a noscia familia, a scutèr i rumores del bosch, a sentir l passèr de la sajions, a cognoscer l cognosciù e l descognosciù te noscia ejistenzes. Podon ge ruèr apede con l’aiut de la emozions, de chel corp che ne arvejina zenza poder ne contèr e ne dir, chel che l’é e coche l’é. Fegures e personajes che fèsc pert de la natura, de la leteratura ma ence de vigne un de nos o de zachei che cognoscion.
Laura Catrani l’é la soula ela te chesta opera metuda a jir da l’Orchestra Haydn te più rejonèdes: trentin, talian, todesch, franzous e ingleis. Na raprejentazion per pecia persones a l’outa (nia più che 50) che se senta ju sun ciuches sot la crepes de èlbes virtuèles e scouta e varda e tasta…
Laura Catrani la é da Rimini e l’à studià a Milan. Joena artista che chier la endesfida e l’é per chest ge pièsc se dèr ju con la musega neva, sperimentèla, olache la opera la vegn a se l dèr ence de gra a sie lurier, a sia capazità de lejer na musega particolèra.
L’é n toch te l’opera “Forèst” che a mi me à sapù zis emozionant per la capazità de Laura de dèr fora sons che dinrèr se à l’ocajion de sentir (fosc demò canche la dimenscion umana la se muda e la va envers la vita o la mort o zeche de trascendent, per se capir, me vegn da fèr l’ejempie d’i sons de la femena che partoresc, o de l’om che l’é do che l mor o de la orazions ciantèdes più veiores). Chel toch olache el l ge domana a ela, na quercia che più no rejona, serèda te sé per la pascion, de ge dir zeche. El l cianta e l ge prea con ardiment: “sag mir etwas…” e ela ge fèsc a saer con paroles che no rua da la bocia che sie cher l’é perdù (“mein Herz ist verloren”) ma do, per fortuna, sia ousc se fèsc sentir e la ge rejona desche demò na femena amò leèda a la natura la é bona. L’é l corp che rejona e nia l cef, la razionalità, l doer. Fadìa a scriver la sort de emozion che passa da Laura Catrani (la natura, la femena) ai spetadores, messajes che passa tras la pel e soraldut l cher. Chest demò n toch che emozionea, ma dut l’é bel e dut passenea adum: musega, strumenc, tesc, ousc, contìa e alestiment. Na opera garatèda, nteressanta, nia sorida ma originèla e emozionanta, per me almanco, che de musega no capesce trop ma che crese de capir (o coscita me sa), canche te valch l’é ite zeche da bon.
Laura Catrani la ne conta te la ntervista da desciareèr zeche de sè, sia vita, de sia profescion e si proiec per l davegnir.

Autora

Olimpia Rasom
Redadora

Cresciuda te Fascia, vive a Busan con chi de ciasa. Me piasc scriver de fémenes, contar sia stories, cognoscer sia vites. Da canche é scomenzà mia enrescida per l dotorat su la eles ladines, no é più lascià lò de scriver con eles. Mete adum ence documentars e reportage per la tv, no demò su la fémenes, e mete a jir picola enrescides e evenc.

Nata e cresciuta in val di Fassa, ora vivo a Bolzano ... >>

Foto Benedetta Pitscheider