Stimèdes dutes, ve conseie de lejer l liber de Aldo Cazzullo: “Le donne erediteranno la terra”, n liber scrit scì coi eies de n père per sia fia, ma ence scrit con chi de un autor che va stroz per l mond con sie eies ben averc. Cazzullo descrif l maschilism che l’é amò te la Tèlia desche vèlch che amò ge vel despassèr, ma chest l’é l secul del “sorpasso” e l veit evident coche l mond sarà maormenter te man de la eles ence tel davegnir. L fèsc la suma ence de cotant che la fémenes é states bones de mudèr te cent egn de istoria sie medemo destin su la tera, l sotrissa cotant fortes che les é chela eles te chi paìjes, olache a ge fèr front a la “misoginia” (l’odie per la fémenes”) e al maschilism, giustificà da na religion, les risia de perder la vita. L scomenza chel temp olache sarà la eles a ciapèr l poter, l poter che eles saprà da manejèr con più cura che ic e i segnèi i é jà forc te la politica europeènae mondièla. De duta la revoluzions che te nosc secul passà cherdaane de fèr o de venjer la soula che à tegnù poz a dut e duc e va inant chiet chiet per sia strèda l’é chela de la fémenes. N liber che dèsc coraje ence a la più spurouses de nos, n liber che proa a ne descedèr! Dedant a fac che amò inchecondì sozet te paìjes desche l Yemen, olache del 2016 na beza de ot egn vegn venuda in sposa da si medemi genitores a n om che podessa esser sie giaf (nos ge dijassane criminal pedofil!) e dó la “pruma net de noza” la mor! Me se strenc l cher, me vegn da vaèr a pissèr cotant che l’arà padì e a cotant che per ela la mort sibie stat “troèr la pèsc” demez da chest mond malà! Chest no sozet demó tel Yemen e béleche mai nos vegnon a saer…Peisse a duta la pìcola bezes sun chest mond, picioles inozentes te la mans de criminèi malé che no èssa derit de stèr sun chesta tera. Fémenes! Demó nos sion bones de defener e salvèr pìcioles e manco picioles, ic, la storia l lo desmostra a dò a dò, amedit no i é bogn! Per chest Aldo Cazzullo ne fèsc forza, ne spenc a tor nosc destin te noscia mans!

Autora

Claudia Conta
colaboradora

CLAUDIA DORIGOTTI (alias CLAUDIA CONTA)

Mie inom l'é Claudia, i ladins me cognosc desche Claudia Conta, ajache me sà bel durèr mie sorainom de familia ladina per me fèr cognoscer. Per me l'é doventà n inom, n marchie e mia identificazion. Da passa 20 egn laore con e per l ladin e la cultura a 360 degrees. Per me l'é n besegn, n piajer, na pascion fona, tant fona che zenza no son bona de stèr. ... >>