Francesco Comina “L’uomo che disse di no a Hitler. Josef Mayr-Nusser, un eroe solitario”.
Ed. Il Margine, Trento.


Cogne dir che no é na gran simpatia per le cauje de beatificazion. Peisse che n sie n muie de persone che à vivù sun chesta tera e che se meritassa l titol de beat o beata e donca no me sa propio giust che zachei l’aesse l titol e autres no. Perauter no me permete de dir nia, lasce che i fae e a la fin te me venc l respet per na storia (chela de la Gejia) che no la é perfeta ma che son ite, e me peisse che ence chest ultim beat l sarà te chela “moltitudine” de senc e beac che me vegnarà encontra e chela di che lasceré chesta tera, descheche empromet la Schertures. E più che n’é miec che l’é, vedù la fadia che i farà a me tirar sù.
Te chisc ultimes meisc se à rejonà, scrit e recordà con libres, teater, messe e zerimonie la fegura de Josef Mayr-Nusser, da Busan. Chest om l’é deventà enstadì beat. Mia solita desfidenza me fajea pissar che magari, ei ei, ence i todesc’ de Sudtirol volea aer o aea besen de n beat (dantocant, ence i ladins i l’à). L’é sorì aer n beat te ciasa. Per trope rejon, de fé sessaben, ma ence de politica (ence se Mayr-Nusser no l ge fasc a scusa proprio a duc).
De Mayr-Nusser chisc dis passé en ocajion de la gran festa, l’era sora utar del Dom de Busan na soa gran foto. Ge vardae su a chel om joen, grignolent e na veiada da festont. Un om da aer respet, segur.
Endana che ge vardae pissae ence che no saee trop de chest om che da sudà no à jurà per Hitler. Demò chest saee, a la dir duta. N at de gran coraje, soraldut per l fat de esser un todesch, e soraldut per l fat che chesta “dejobedienza” vegnia da un om che vivea te Sudtirol apontin te chel moment storich (talianisazion del raion, opzion, ocupazion todescia...)
Dapò me é ruà te man l liber de Francesco Comina, na persona – jornalist de lurier - che se cruzia de pasc soraldut, e che ti chisc egn é emparà a aprijiar ence per coche l’é bon de portar persone de autiscim valor a rejonar co la jent de Busan te na forma sciantiva e averta.
E l’é let. L’é n liber vegnù fora del 2000 (e donca no en ocajion de la beatificazion e chest à ja si merit) che l conta la storia de chest om. E se posse dir, l respet che me vegnia da ge recognoscer per so azion te i confronc del nazism, l’é deventà fortiscima amirazion per un om de grandiscim spessor.
L liber l conta de na persona che per chi che creit l’à enciarnà i valores de Crist e per chi che no creit, na persona che la é stata bona de refudar n sistem de violenza tras na forma de no-violenza e de enrescida de dialogh fat de parole de pasc.
Un om fort daìte, formà da egn de pensieres e discuscions con si amisc e jent de la Azion Catolica che l fajea part. L’at de no jurar per Hitler l’é stat demò l’ultima azion de n gran lurier de pensier che portaa a refudar sistemes totalitares che portaa a la destrujion, soraldut de l voler ben, de l’afet e de l’amor anter le persone de na familia, de na comunanza, de n raion.
Mayr-Nusser l’era na persona che lejea e saea chel che sozedea tel mond, soraldut n Germania. L’aea na vijion chiara e razionala del mal che se sparpagnaa fora. L pericol del destraboniment del sens de comunanza (soraldut endana l temp de le Opzion) l lo fajea sutar inant e endò per jir a rejonar con la jent e la far pissar con si ciaf e si cher.
L’é stat un om che à dat dut si esser per la pasc, la cordanza, l’amor. Ence a cost de renunziar a la vita con soa femena Hildegard (che femena! bona de azetar l fat che so om morisse per na tal rejon), e no veder crescer so fi Albert, che el l’à vedù l’ultima outa canche chest piciol l’aea un an.
Se posse dir, dijesse che Mayr-Nusser l titol de beat l se lo merita dut e ence zeche de più: per la testamonianza che l ne lascia de poder refudar l mal, la violenza, l’odie. Soraldut per l fat che con sia storia l trasmet n gran coraje. Chel de saer dir de no en pruma persona. De esser en pruma persona testamonech de valores più gregn (e no demò o no demò per forza de valores del Cristianeism).
L liber de Francesco Comina l te porta a cognoscer la fegura de Mayr-Nusser zenza te far sentir leà a so pensier, l te lascia la ledeza de arvejinament, ma a la fin l’é chela fegura che no la te lascia più jir.

Autora

Olimpia Rasom
Redadora

Cresciuda te Fascia, vive a Busan con chi de ciasa. Me piasc scriver de fémenes, contar sia stories, cognoscer sia vites. Da canche é scomenzà mia enrescida per l dotorat su la eles ladines, no é più lascià lò de scriver con eles. Mete adum ence documentars e reportage per la tv, no demò su la fémenes, e mete a jir picola enrescides e evenc.

Nata e cresciuta in val di Fassa, ora vivo a Bolzano ... >>