The Beauty and the Beast
Da semper la contìes de Grimm e Charles Perrault, la contìes che la “Disney” l’à dessegnà per dessegnes animé, chino e Tv, les conta de prinzesses, de bezes e touses che chier e troa sie prinz; chesta contìes les à chela de moscèr e insegnèr. Me é scialdi domanà se te nosc mond modern l’é amò realistich e san, lascèr che noscia bezes vèrde conties che met dant n model de fémena de “etres tempes". L se trata de fegures che te la contìes à aspirazions da ge lascèr incomai al passà. La “Disney” da n trat in cà la proa a ne portèr dant de veia contìes, tantocant adatèdes a na sozietà moderna. Na sozietà del 21eisem secul, olache noscia fies à debesegn de esser educhèdes a chierir vèlch da auter che bele l “bel prinz” desche soul fin de vita, desche soula rejon de esser sun chesta tera.

La prinzessa Belle, n model per la bezes d
aldidanché, patrones de sie destin
L’é desche l “remake” de la Bela e la Bestia (the Beauty and the Beast). L’eroina “Belle”, che no a cajo la é impersonèda da Emma Watson, (cognosciuda da duta la bezes modernes desche Hermione te la saga “Harry Potter”) l’é na tousa con n gran cef te la vita e tel filmat. L’é na ela che no é interessèda nia in dut a chierir e troèr “l prinz” desche soul zil te la vita. Ela la raprejentea n mix perfet anter cher e cervel, n model ezelent per la bezes inchecondì. Belle la é più inant che duta la autra persones de paìsc, l’à na bona educazion e i libres l'é sie miores amisc, per chest la se desferenziea trop da sie “entourage”, la se tol fora da duta la autra fémenes ajache la é patrona de sie destin. Sia ambizion l’é studièr e imparèr a cognoscer l mond e se instessa per sin jir sorafora i confins de sie picol mond.

Dut chel che l
’é desvalif fèsc tema
Per l fat che Belle preferesc lejer che pissèr a se maridèr, te paìsc i la vèrda mèl e i la grigna fora, i la ciapa per mata, bele percheche la é desvaliva. Belle no se lascia conformèr, la é forta e segura de sé… N’autra bona lezion per la eles de inchécondì, se pisson che per egn alalengia la eles é states tegnudes con forza dalènc da scoles, libres e educazion. No l’é mai sorì jir de contra al “status quo”, o al “mainstream” coche se disc con na parola ingleisa e purampó l’é demó coscita che nasc idea neves, inovazions per l mond, mudament, davegnir.

I miores amisc de la fémenes l’é i libres
Belle ge insegna a lejer a la bezes de sie paìsc. Per chest la se ciapa finamai la cridèdes! Amó aldidanché te tropes paìjes del mond i omin ge nea a la eles l’azess ai libres e a na educazion. L se trata de omin te cultures amò trop maschilistes che à tema de na fémena indipendenta e con na bona educazion, omin che sà che fossa senester per ic ge tegnir cef a na tèl fémena letrèda…

L picol mond segur

N’autra tematica moderna uzèda fora tel film l’é chela del picol mond segur, chel de la majon che per jir incontra a sie destin e a se instesses ge vel lascèr amàncol per n trat. L picol mond l’é strent, ma belapontin per chest ence segur! L mond gran e granent l speta demò de esser descorì in lènch e in lèrch, percheche demó coscita se pel se vaghèr de neves confins e n orizont più gran.

Imparèr a vardèr sorafora la biota parbuda e fèr n percors de mudament
N auter messaje che descrif na piaa de noscia sozietà, chela del cult del superfizièl, de la soma importanza che ge dajon a l’estetica. Belle impèra a vardèr sorafora “l bel”, la impèra a ge voler ben a la Bestia e per chest la compesc sie destin de librèr la Bestia dal malefizie che la tormentea. Tantocant per poder mudèr aspet, dant l’é la Bestia medema che cogn mudèr, la cogn fèr n percors de mudament daldaìte de sé! L bal desche educazion al respet L bal desche forma de respet; chest l’é vèlch che zacan se coltivèa de più, e no pa demó anter chela fieta de sozietà che stajea miec e podea se permeter la mior educazion. Ei, percheche per imparèr a se cognoscer su n parquet de na sala da bal ge vel scialdi imparèr “teamwork”, respet e fiduzia tel partner. Belle l’é seguramenter la pruma prinzessa di tempes modergn… e per i più curiousc: sapià che la contìa de la prinzessa Belle l’é na lejenda franzousa e desche duta la lejendes la à n sotefond de verità storica - la Bestia e Belle tel Medioevie i à dassen vivù te la Franzia e dapodò te la Tèlia, disc la istoria.

Autora

Claudia Conta
colaboradora

CLAUDIA DORIGOTTI (alias CLAUDIA CONTA)

Mie inom l'é Claudia, i ladins me cognosc desche Claudia Conta, ajache me sà bel durèr mie sorainom de familia ladina per me fèr cognoscer. Per me l'é doventà n inom, n marchie e mia identificazion. Da passa 20 egn laore con e per l ladin e la cultura a 360 degrees. Per me l'é n besegn, n piajer, na pascion fona, tant fona che zenza no son bona de stèr. ... >>