Judith Leyster (1609-1660)
Judith Leyster l’é stat na pitora de gran talent, segur la più cognosciuda del Secol de Or de la pitura olandeisa. L’é stat la pruma femena a esser touta su te la Gilda de Sèn Luca, a Harlem, olache la era nasciuda. Te la pruma pèrt de sia vita l’à depent soraldut popes e tosec, scenes de vita de vigne dì, natures mortes, dessegnes de botanica e chèdres con colores da èga. No se sà delvers olache l’à emparà ma somea beleche segur che Frans Hals sie stat sie maester, amancol per n trat. De fati, tropes chèdres i à sie stamp, enscinamai l’autoretrat che la se aea fat, che la grignotea e la é vestida da festa, ge va dò a chel stil orì da chel gran artist che l’era Hasl. Judith Leyster se aea maridà con n gran auter pitor del Secol de Or: Jan Miense Molenaer e con el la é jita a stèr a Amsterdan. Chiò la madura e la muda stil, la jia coi colores per dèr lum ben definides e la depenc autres sogec: musegonc, omegn che jia co la chèrtes, jent pureta; scenes de vita reèla e no semper fortunèda.

Clara Peeters (1595-…)
De Clara Peeters no se sà trop. No se sà olache l’à emparà a depenjer e olache la é morta. Se cognosc perauter i bie chèdres che l’à depent anter l 1607 e l 1621 e se sà che la depenjea n Olanda. Clara depenjea soraldut natures mortes, zeche che per la ela de enlouta, che no podea apede a studies de anatomia, ge permetea de depenjer ence zenza gregn studies. L magnèr, l desch emandì con piac e chicheres, l’è de spes l soget de sie chèdres. A Claa Peeters ge vegn recognosciù la capazità de depenjer e descriver a na vita che pec saea enlouta fèr. La é maestra de jièr coi reflesc, con i particolarès che conta vigne detail de chel moment che somea demò “mort”, ma te sé l’à vita, storia e cultura.

Rachel Ruysch (1664 – 1750)
Rachel Ruysch l’era la fia de n botanich e anatomista. Bele da joena Rachel la ge didèa a sie père a depenjer fiores e picola besties. De 15 egn la va a emparèr a depenjer da Willem von Aelst e la se marida con l pitor Juriaen Pool. L’arà 10 fies che no i la tegnarà dalonc dal depenjer: tel 1699 ge vegn sport de fèr pèrt de la soziazion de pitores de L’Aja “Confrerie Pictura” e diesc egn dò la depenc per la cort de Düsseldorf. Rachel l’é na “antesignana” del tele-lurier: defati, la domana e i ge permet de depenjer a cèsa e de jir a Düsseldorf demò canche serf. Rachel l’à depent na vita entrìa e l’à lascià n grumon de beliscimes chèdres, na pèrt ence da veder te la Galaria Palatina de Firenze.

Autora

Olimpia Rasom
Redadora

Cresciuda te Fascia, vive a Busan con chi de ciasa. Me piasc scriver de fémenes, contar sia stories, cognoscer sia vites. Da canche é scomenzà mia enrescida per l dotorat su la eles ladines, no é più lascià lò de scriver con eles. Mete adum ence documentars e reportage per la tv, no demò su la fémenes, e mete a jir picola enrescides e evenc.

Nata e cresciuta in val di Fassa, ora vivo a Bolzano ... >>