De pìcole trece, o miec de pìcoi “dred” de ciavei encolorii de fuxia che fasc da cornisc a doi eies feruscoi te n mus grignolent, speie del carater gustégol, sensìbol ma determinà, che Lara conferma te noscia ciacolada. N mus da beza, ence se Lara Steffe, da Moena e da béleche 20 egn ensegnanta de educazion artistica te la Scola de Fascia, proprio na beza no l’é più. So “look” no l’é de chi più en doura te anter la categorìa di prof., ma no l’é voa de anticonformism: “gé fae le robe coche me le sente, no voi ge dimostrar nia a nesciugn e no me enteressa più che tant l giudizio dei autres; troe sodisfazion te chel che fae e son a post coscita.” E la arsegura che nesciugn, ne genitores ne dirigenc, ge à mai fat problemes o musc particolares... o amàncol ela no se n’à mai adat. Lara Steffe no l’é demò na ensegnanta, ma ence na artista poliedrica, che lascia l segn de sia espressività smazan tel marmol dur e freit o foran si dessegnes su la pel solvia e ciauda de la jent. Esperienze desvalive: da la lezion te scola, ai simposi de scultura stroz per l mond al lurier tel “Bunker” de tattoo, fosc l’é apontin chele che tegn vif l’estro de far e de vardar inant, che permet de se confrontar con ambienc e realtà desvalive, de no se sentir sofear te na pìcola val da mont, olache la jent la é pech usada a veder robe neve. Lara Steffe e l’art L’art per me l’é valch che le persone à daìnt, pol esser scultura, dessegn, ma ence poejìa, musega, dut chel che te dasc la possibilità de dir valch, de esternar chel che tu as daìnt. Dapò l’é na testimonianza, valch che se lascia, n segn de la prejenza, del passar de valgugn te n post. L’é na vijion personala che pol ence deventar coletiva. Te la Sardegna l’é n pìcol paes olache i fasc ogne an l simposio e dute le sculture i le met fora, e canche tu vas fora per paes l’é dute le sculture una apede l’autra che te compagna, n muie aprijiade da la jent che la se à usà a viver con cheste “prejenze” apedejù. A mi, a veder chele che aea fat i scultores i egn inant, me saea che ic i fosse aló. Coscita l’art nasc desche valch de individual, la vegn condividuda e la doventa de duc. L’é na sort de comunicazion che pol ence mudar contegnù e segnificat, no l’é tant emportant che la jent capesce chel che voi dir. Chel che fae l pol ence no piajer, podon n discuter, la roba emportanta l’é che l dae calche sensazion, emozion e pensier, ence se desvalive da chele che aeve gé; me endespiajessa se no l dasc proprio nia. L’art à semper fat part de mia vita: canche ere picola te mia familia l’era parenc che sonaa e che depenjea, gé é semper dessegnà e é semper abù l’idea de far la Scola d’art e dapò l’Accademia. Dò l’Accademia l’é stat n trat che no é fat più nia, fosc ere mingol en crisi, ensegnave, ma no me jiva de far nia. L’é stat n trat de temp cert. Dapò l’é mort mio pare e per me l’é stat n gran dolor che me à portà a me vardar daìte, a me far domane e é endò tacà a laorar, é fat na serie de incijion dal tìtol “Io, lo spazio e(D)io” per cerir l perché de nosc esser su la tera. La tecnica per ge dar forma a l’art Te chisc ùltimes egn me sente n muie più leada a la scultura e ades mio amor l’é la scultura tel marmol. Gé è tacà a zipiar l legn, dapò me è arvejinà al marmol perché è tacà a jir stroz a far simposi. Jai egn i me à envià a far part de la comiscion artistica de n simposio tel Friul, e me é enamorà de chest material. N material dur, che domana gran fadìa... ma se fasc fadìa ence a laorar l legn. L’é tecniche e strumenc desvalives, per l marmol l’é smerigliatrici che te deida a far più sorì. No dijesse che l’é più sfadios che l legn. Na roba che fosc somea certa l’é che l’é n muie de femene che laora l marmol, fosc de più che chele che laora l legn. La tecnica la é emportanta, perché gé peisse che inant se cogn saer far e dapò se pol interpretar, interpretar zenza saer far l’é senester. A scola i primes egn ge ensegnon la tecnica, perché no se pol se esprimer se no se cognosc la materia e i strumenc, ma dapò da zeche ora se cogn la molar, se no la limita la esprescion personala. La tecnica l’é razionalità, l’art enveze la domana de se lasciar jir e ge jir dò più a l’istinto che a la razionalità. L’ispirazion artistica Fin ades é semper laorà sun emozion leade a momenc de mia vita o a la jent che me stasc vejin. Al scomenz, dò la scola, laorave soraldut canche ere enirada per me sfogar, dapò l’é stat l dolor che me à fat tacar int a laorar e dapò tel temp l’é stat na vijion semper più positiva de le robe, l’é soraldut le robe bele che me ispira. Al simposio a Reana del Rojale tel Friul é fat na scultura che l’era da temp che sentìe de cogner far, che la raprejenta mia mare, mio pare e me. La é dedicada a mio pare e da chel moment no é più sentù l besogn de laorar sun chel argoment. Se vesc che cogneve ruar a far chel, desche per serar l cerchie che aeve avert con le prime incijion. L’é vedù desche l concepiment, la nascita, l braciacol anter doi persone, l’om e la fémena, te chest “busc” che raprejenta l venter, ma ence l ciaf de n spermatozoo... jà i egn inant aee fat sculture leade al pensier del moment del concepiment, la prejenza de chisc spermatozoi, l mister de la nascita e la spiritualità... La maternità e l raport con mie opere Canche fae na scultura, soraldut chele mìngol grane, per me l’é desché n “parto”, no sè... gé no è fies, ma canche cogne lasciar na mia opera te n post che no l’é ciasa mia me endespiasc n muie. Canche tole part a n simposio fae semper n modelin de creida o de legn, mìngol percheche l’é pech temp e col modelin capesce sobito i taes che cogne far, perché sul sas no é amò n muie de esperienza, ma ence percheche le opere grane de sas le resta sul post, coscita posse me portar a ciasa “la foto del fi”, che lasce aló. La maternità l’é na roba che sente forta e spere de aver la fortuna de proar. Ge pense da spes, ence percheche l’orloi biologich l va inant, per ejempie l’an passà, no sé perché, é fat na scultura de na fémena che speta.... L pensier che me porta a me domanar chi che son, che che fae chiò, che cogne far te mia vita, l’é leà de segur ence a l’estro de maternità... Viver da artista te na pìcola val ladina Gé vive ben te mia val. Son una che va stroz e no se ferma tant a ciacolar e per chest più che un me à dit che somee una che “se la tira”, ma la jent e la vita de paes no la me dasc nesciun festidech. No crese nience che te nosce val mence oportunità, basta voler e saer le troar, enveze che se lamentar che no l’é nia. Peisse che se vif ben te nosce val, perché l’é le persone che fasc l’ambient... a dir la verità é ence pensà n muie de oite de jir a star te n bait sa mont... Ge é studià a Milan, son stata per cater egn te zità, e no vedeve l’ora de vegnir via. Tornada chiò me é sentù n muie serada e l’era momenc che no vedeve l’ora de jir endò te zità, magari per na dì o doi. Ades ogni tant volesse dalbon me n star sa mont. Me piasc ence star da sola, no é paura de star da sola, anzi, stae ben, me tae fora mie spazie. Pense che l’ambient sie fondamental, la natura e l’ambient te deida a te vardar daìnt. Me piasc jir a pe tel bosch, scoitar i ruves, contemplar, meditar sun mi pensieres. Dapò me stasc ben ogne tant jir te zità o vardar de far esperienze più dalonc. Però cogne dir che la situazion per l’art te noscia val la é mingol senestra. Fosc me fale, ma me sà che te Fascia aon na vijion mìngol più serada de l’art respet a le autre val ladine, te Gherdena e Badia me sà che sie più artisć orienté al contemporan. Chiò me sà che sion amò trop leé a la tradizion, la jent fosc no la é amò enjignada a na vijion più ampia. Dapò anter i artisć duc à soa personalità, de spes n muie forta e valch oita l’é ence n cert egocentrism, con zachei se stenta a far descorsc costrutives. Ma l problem maor per mie cont l’é che le aministrazion à massa pecia atenzion e conscidrazion per l’art, ence se fossa de gran potenzialità. Se fae l confront con pìcoi paesc olache son stata, per ejempie tel Friul o te la Sardegna, é vedù che aló l’atenzion envers l’art la é dalbon n muie maora, le opere d’art le vegn valorisade e no serade te n magasin.

Autora

Lucia Gross
Diretora responsabola

Fia de genitores fascegn e cresciuda tel Trentin, fora de Fascia, son enciasada da 30 egn te chesta bela val ladina, a Poza. Scrive per ladin da passa 20 egn, desche coordenadora e responsabola de la redazion de Fascia del sfoi “La Usc di Ladins”: del 2012 son doventada giornalista profescionista fajan l’ejam de idoneità a Roma, per ladin. Me piasc chest pìcol e glorious lengaz, e me piasc ... >>