Ti ultimes egn te nesc paìjes e zità na femena col ciaf scuert da n vel soscedea atenzion e, te n muie de persone, ence sentimenc negatives desche desfidenza, tema o ira. L’identificazion del vel con la religion islamica, ensema con la confujion, l’ignoranza e la desfidenza de noscia sozietà envers l mond musulman, ne fasc desmentiar che l ciaf corì (che sie da hijab, fazolet de la giava, chador, foulard o vel da monia) l’é stat e l’é prejent e segnificatif per n muie de femene e te n muie de culture e comunanza.

Simbol de eleganza, de partegnuda o de clas, l vel l’é n element evocatif che pel se portèr dò n muie de segnificac desferenc, che muda aldò del contest e che de spes l vegn percepì a na vida deldut desferenta da chi che l porta e da chi che l varda. Te noscia sozietà de anchecondì, olache la parbuda ge struca l’eie al descorir più che l’é meso, enveze che a corir, “svelar” doventa donca n simbol de consaputa e ledeza de la femena, e alincontra “velar” vegn vedù desche n segn de prejonìa e sotmiscion.

A ne orir na coltrina, o miec, vedù l tem, a ne tor demez n vel te chest argoment de gran complessità, l’é na beliscima esposizion che se pel veder al Museo Diocesano Tridentino, a Trent te Piaza del Dom.

L’é la mostra de fotografìe de Carla Iacono dal titol “Re-velation”che ne sporc 20 retrac de straordenara beleza, olache l fil ros l’é apontin l vel: retrac olache vegn tout jù semper la medema tousa (la fia de la fotografa) con l ciaf corì da n vel, te na lingia de situazion desferente. Al zenter de l’atenzion vegn metù donca apontin l vel, che moscia, descour sie desferenc segnificac.

Interpretazon de hijab, vei de religiouse o devote catoliche, foulard de femene de l’est Europa e vei de nobole de tempes passé, con composizion che recorda i retrac europeans del Siecent e de l’Otcent e valch outa i fasc referiment esplizit a cadres de autor cognosciui. No mencia le contaminazion anter culture che desvela someanze e desferenze e i elemenc simbolics che jonta segnificac soc a la parbuda stilistica rafinada.

Zenza giudizies e con la lejereza de n vel, Carla Iacono ne envìa a pojar nesc eies te tempes e lesc desferenc, per pissar a n tem senester e delicat zenza pregiudizies ma con la marevea de l’estetica e de l’art.

Soa esposizion resta da veder a Trent enscin en lunesc ai 30 de oril, duc i dis, tel Museo Diocesano Tridentino, con orarie 9.30-12.30 e 14.00-17.30. En sabeda ai 28 da le 4 domesdì e en domenia ai 29 da le 11 da doman l’é ence doi vijite vidade speziale, averte a duc e zenza besegn de prenotazion.

Autora

Lucia Gross
Diretora responsabola

Fia de genitores fascegn e cresciuda tel Trentin, fora de Fascia, son enciasada da 30 egn te chesta bela val ladina, a Poza. Scrive per ladin da passa 20 egn, desche coordenadora e responsabola de la redazion de Fascia del sfoi “La Usc di Ladins”: del 2012 son doventada giornalista profescionista fajan l’ejam de idoneità a Roma, per ladin. Me piasc chest pìcol e glorious lengaz, e me piasc ... >>