I egn novanta del secul passà (1900) i é stac consacré soraldut al studie del cervel. I studiousc con sie studies i é stac bogn enscin a ades de sin capir fora demò de na pìcola e pìcolenta pèrt de chel maraveous computer che l‘é nosc cervel. A la dir duta i sentiments inchecondì à desmostrà de festejèr sie più gran „Comeback“ dal temp romantich te la storia. Dut l mond à vaà per la mort de la prinzessa di cheres Lady Di, politizi desche Kohl e Schroeder no se tegnìa de mèl de la lègremes vaèdes en publich-al contrarie! Frases desche „pura emozion“ vegn metudes desche pizèdes de sèl ti artìcui di giornalisc‘ più de nonzech e l più gran „jmorn“ american te televijion: “la soap operas” e i “reality” i é „powered by emotion.“ I soziologhes i disc che scialdi de più l‘emozion e l‘emotività la vadagna su n stel de via più detà da la fondamenta o da l’auto-control.
L somea che fossane endodanef finiì te n moment neo-romantich. L spirit de chisc tempes l‘é piutost chel de se defener da la freida logica e de se oujer a na veduda più intuitiva del mond, più comanèda da sentiments. Ence a la relazions coi etres ge fèsc da sotefon scialdi de più l‘intuitività e la „Stimmung“. Dai sentiments se spera de gin vadagnèr te na vijion più fona del mond e de la medema vita. Belapontin tel moment giust l‘é vegnù fora l best-seller de Daniel Goleman: „EQ-Emotional intelligence“, per bon ladin: EQ (quozient emotif) fondamenta emozionèla, e dapodó de seghit tropes de autres sun chesta tematica. Chel che fèsc na gran marevea l‘é che belapontin chest liber l‘é n tratat su l‘importanza di sentiments per l suzess te la vita e vèrda mo l‘à pa abù na scì gran resonanza zis te l‘economia e tel management. Chesta sfera scì razionèla e ogetiva la é da pez dò che la subesc de gran mudazions: te chela che l‘economia se tramuda te na economia de consum, la coscì dites „soft skills“, per bon ladin „capazitèdes, abilitèdes emozionèles“ , les ciapa scialdi maor pé.
Lurèr aldidanché per la maora vel dir lurier de relazion e sentiment. L suzess l lo arà chel che agesc con fondamenta emozionèla e che sà durèr la doi “funzions- chief” te chest jech de relazions: comunicazion e presentazion de sentiments positives e control de chi negatives. Chest vel dir esser bogn de fèr spervajo i etres de tia idees, antiveder, abilità de sciacarèr, stimolèr l voler di avantores. Ben segur che duc luron più bolentiera con na persona sorida, positiva e otimista impede a lurèr con na lagna o n stramp cervel encebenche “genial e sorafin”. Ma la soula fondamenta leèda ai sentiments la no é seguramenter una na soula garanzia per l suzess. Seguramenter la podessa esser na abilità fondamentèla te vèlch lurier desche Diplomac, Chef de Personal o Curatores de Enemes, ma zenza la fondamenta cognitiva e l saer, la costanza e la forza de volontà, no garata nience noscia sozietà de comunicazion e de servijes. Cognon amò produjer, conzepir, lurèr fora e fèr su. La soluzion la é ben scempia e la cognoscion duc: no l‘é spartijion entrà ferstont e sentiment. La doi robes va ensema, noscia memoria, nosc pensier e nesc giudizies i é mesuré fin junfon da nesc sentiments e da noscia emozions. Pissave chest: canche sion de bona luna e de bona voa se recordon ben de autra robes che canche sion strambes e lunàtui o ju de corda-inlouta noscia emozions se dèsc jù sun nesc pensieres bendeché a na vida piutost fona; adertura la paroles che cerdon l‘é na costion emotiva!

Autora

Claudia Conta
colaboradora

CLAUDIA DORIGOTTI (alias CLAUDIA CONTA)

Mie inom l'é Claudia, i ladins me cognosc desche Claudia Conta, ajache me sà bel durèr mie sorainom de familia ladina per me fèr cognoscer. Per me l'é doventà n inom, n marchie e mia identificazion. Da passa 20 egn laore con e per l ladin e la cultura a 360 degrees. Per me l'é n besegn, n piajer, na pascion fona, tant fona che zenza no son bona de stèr. ... >>