Enstadì l’é stat premià la eles che à tout pèrt al concors leterèr “Il Carro delle Muse”, scomenzadiva ruèda a sia terza edizion, metuda a jir da Loredana Repucci, manager e enstessa scritora.
N bel domesdì de festa vidà con braura da Virna Pierobon tel teater de Navalge a Moena con balet (la picola balerines del “Centrodanza”), musega (Paolo Bernard e Angela Chiocchetti), ma soraldut la schertura de tropiscima eles che se dèsc ju per dilet e pascion con la paroles o la esprescions grafiches.
Femenes che da Palermo a Maran à manà ite sie scric, sia poejies e fotografies, esperienzes vivudes o enventèdes, sentimenc de tempes passè e ilujions del davegnir. De chestes tropes les era a Moena per la premiazion.
Al concors podea tor pèrt eles de vigne età, na pèrt de i pesc’ la é jita defati a la tosetes che à manà ite toc, perauter de boniscima calità. Joenetes che bele de 12 e 13 egn les è bones de scriver con ferstont e pascion.
La granes les à prejentà lurieres desvalives, più o manco de finzion, più o manco autobiografiches. Chis, lec dant da la atora Emma Deflorian, à lascià che l publich che scutèa su jisse ite te la contìa o la storia o la poejia, crean na beliscima atmosfera de condivijion.
Al concors à tout pèrt ence eles de Fascia e Fiem, Trent, Persenon e Maran.
L terzo pest per la poejia l’é jit a Alberta Rossi da Soraga con na poejia doucia e duta demò femenila dal titol “Attesa” (na cercia: E’ silenzio./Il ventre piange./Reclama quella pienezza/che nel vuoto spaventa…).
Na menzion spezièla la ge é jita ence a Federica Mormando (colaboradora de gana) con na poejia sul genozidie de i Armens (na cercia: L’Ararat/barriera di luce rubata/riflette fiori d’albicocco/al profumo di lavasc/E un giorno/Vi accecherà/…).
L prum per la conties l lo à ciapà Graziella Lovano da Palermo con l scrit “26 maggio 1915”. L prum pest per la poejia l ge é jit a Ingrid Zancanella con n omaje a la zità de Palermo e l prum pest per la grafica a Mariagrazia Bianchi.
Duta la operes les é publichèdes te n liber dat fora da l’editor Greco&Greco de Milan.

Informazions sul concors: www.ilcarrodellemuse.com

Autora

Olimpia Rasom
Redadora

Cresciuda te Fascia, vive a Busan con chi de ciasa. Me piasc scriver de fémenes, contar sia stories, cognoscer sia vites. Da canche é scomenzà mia enrescida per l dotorat su la eles ladines, no é più lascià lò de scriver con eles. Mete adum ence documentars e reportage per la tv, no demò su la fémenes, e mete a jir picola enrescides e evenc.

Nata e cresciuta in val di Fassa, ora vivo a Bolzano ... >>