Col se arvejinèr de la fin de l‘an podon ve sporjer l numer 25 de gana sun papier, aon volù dedichèr chest numer a na reflescion „Ite o fora“. L’esser ite o fora da n sistem, l passèr da na condizion a n’autra, se n jir o vegnir, esser pèrt o nia. Con chest volon averjer più fenestres per lascèr ite o jir fora pensieres che tol cà tematiches desvalives: da la malatìa mentèla olache vèlch’outa demò n fil sotil despartesc l’esser ite o fora da la realtà che aon dintorn a la sperduda de saer de aer n burt mèl e varir. L jir sorafora i confins del cef e del corp pel vegnir didà da la meditazion descheche ne conta Tania Detomas ma l’ite e fora l’é ence confins, la seides che despartesc, na convenzion ma ence n sistem de autoprotezion che sera fora chi che no volon ite. Lucia Gross ence travers na intervista a Cecilia Rinaldini, ne conta de migranc, de mures ma ence di coridores umanitères. L tema de la migrazions l’é argoment tras più fers ti ùltimes tempes, che vegn strumentalisà e vèlch outa sotvalutà.

Ite e fora l’é ence chel che porta la persones per rejons desvalives a l’ejil descheche scrif Ulrica Perathoner rejonan de eles e èrt, ma ence te nosc raion turistich aon tropa jent che vegn ite e tropes che va fora, la ostieres de nosc raion à tras abù na funzion de coleament anter i turisć e la jent del post descheche ne conta Karin e Elly Sanoner te na intervista de Ingrid Runggaldier. L raport con la persones no l’é però per duc sorì soraldut canche i pensieres e i enteresc i é dut autramenter descheche conta Olimpia Rasom te n’intervista con na persona Asperger che cogn troèr si strategìes per se relazionèr coi etres e l’à na ment „google“. Senester l’é ence l stèr ite te n corp che no respon a nosc sentir desche l’aer n corp da ela e se sentir el coche scrif Elisabeth Kostner de Leon che no l’è mai doventà n el ma che l’é stat e l se à sentù da picol en su n el. Ma ence tel jir di egn la vita muda e col jir en penscion se va fora dal mond del lurier e se rua ite te n‘autra dimenjion descheche vegn contà te la testimonianza de Wilma Runggaldier. Fora dal dossier aon ence vèlch articol dedicà al Giapon olache Luisa Bertacco scrif n belot reportage de so viac e Olimpia Rasom va ite te la cultura de la eles tel Paìsc dal soreie che leva. Vèlch poesia de Antonietta Crepaz ne mena tel passà e tel prejent e i recorc del passà doventa chèdres tres l spirit gaert de Marisa e Paola Bosin. L chestionar l’aon out a Simon Kostner, ator, regist, musizist, esplorador e interpret de la cultura ladina.