Chei dl Cunzil ëssa ulù les avei tres n iëde per for chla criatures malaniëdes, ntant sce ne ti fovla garateda defin: de scunja­ré coculi y stries ora dl mont chël ovi mussù se tò ora dl cë. Na luëgia ovi mussù ti cunzeder: chi vestri ie tlo y à la rejon de pudei sté nzaul.

Medemo cajo de chël de chi iërmes ghiei, curc y grasc: i sfranjer ne jova, i ie zahes, y ne crëpa; sce te uës i avei dal moch muësses cun n vel cë de massaria i trancë amez via, che l regore ora chl si budelam blanchic. Nscì ti fovla jita a chla oma che ova petlà l sant preve - cunesciù per tei esorzismes - de la deliedé da chla meltra che fajova flacé ju la plantes pernan che les ova tan bel pià ite: chi iërmes la nvieia via cun l se furé dal sotsu dla ravisa se magian ora dl puzer la miola tëndra, dantaldut chëla de salata, cun n tel iërm iëles andates! Chl bon benefiziat ti ova tlarì: sci, ie posse te judé, ma tu muësses me mustré na luëgia ulache i possa viver y se la tré zënza ne dé npaz: ie i aviseré po ora iló. Y i iërmes, bravi y ulghënc, se n fova stac.