Intervista a N., na femena joena, gustegola e con na ment originèla. La se rencura i doi fies che i é duc doi autistics coi sistemes che l’à emparà ela, cresciuda enstessa Asperger*. L’é ela che la ge ensegna co fèr a viver te chest mond acioche l dut no sie massa senester. L’à n compagn, algegher e otimist, che l ge stèsc apede con amor a ela e a si fies.

Conteme mingol de te.

Mia condizion la é dassen particolèra… pec cognosc e sà chel che l’é la sindrome de Asperger. Nos femenes Asperger sion cheles che te la storia sion states la malèdes de deprescion, la schizofreniches… nesciun ne à mai capì. Vivon te na condizion olache cognon someèr chel che no sion, e chest per duta la vita.

Chest vel dir na gran capazità de adatament, saer viver te doi realtèdes. Spiegheme mingol chest.

Gé per ejempie scoute scialdi trop canche la persones rejona per capir de che che les rejona, ajache gé no saesse de che che pel rejonèr doi persones. Ge rejonasse demò de mi enteresc.

Fame n ejempie.

Te chest moment mi enteresc l’é mi fies, la politica e la musega e no rejonasse auter che de chest, però é capì che a l’autra persones no se pel ge rejonèr demò de chest. Eles les vel che se rejone ence de autra robes.

Coscita tu co fèste?

É studià duc i argomenc de chi che se pel rejonèr co la persones. Al scomenz no capìe. Canche ere beza per ejempie ere enteressèda demò a l’èrt e a la politica ma te pes ben capir che na beza de ot o nef egn che va a scola e rejona demò de èrt e de politica la é deldut serèda fora. Dapò é padì de bulism e aló é capì che fosc l’era miec se me adatèe e donca é scomenzà a studièr, a veder de chel che rejonèa la jent e é metù man a emparèr robes sun argomenc che ge enterescea ai etres. Desché rejonèr de moda per ejempie…

Zeche che a ti, me peisse, no te enteressa nia deldut…

Ma te pree! però me tegne a ment, me note su dut, chest no l’é senester per me. Fae sorì a me recordèr e meter via la informazions. Ence ge é mie enteresc e sé, ajache ge é na ment “google”, che cogne aer duta la informazions a la leta, posse meter via dut chel che me serf per rejonèr co la jent. Sente che se rejona de moda? Eco, sé rejonèr de moda. Él zachei che rejona de sport? Bon, sé dut de chel argoment.

Te ès dut te pìcola valijes da tor ca te n besegn…

Ei, dut pìcola valijes che perauter fae na gran fadìa a tor cà ajache te mie cef, endèna che rejone con chela persona me domane: perché no rejonone pa de mi bec? Endèna son aló che rejone de moda e de sport o de autra robes.

Èste n pensier dual?

Magari dual! Magari dual… Mie pensier l seghita a jir, dijesse che é n pensier arborescent. No passa n secont che mie cervel no aesse amacol cinch-sie canai de pensier averc, e da vigne canal pèrt amò etres diesc canai, de seghit, zenza mai n moment de paussa.

No te sténcel chest tant?

Ei, trop, soraldut tel crescer. Volesse tant n’ora per pussèr fora ajache no la é nience de net. Dorme n’ora e dapò me desceide n’autra ora, fae fadia a me endromenzèr da nef ajache entant dut se à descedà fora, dapò dorme amò n’ora, magari. Ei, la volesse proprio n’ora de paussa.

No l’é na dimenscion sorida. Este stata bona de la azetèr?

Ei, la é azetèda, ence se posse dir de aer na sozialità minimala, anzi dijesse che gé no é sozialità. La soula sozialità che é la é co la jent che laore, con chela che son leèda per via de mie fies, con mi genitores, mie fra e vèlch veia amica che sente n’outa a l’an e chest me bèsta. De più no voi. E dapò, ei, mi compagn, sessaben. Ge é na vita sozièla menuda menuda e chiere de stèr più che l’é meso da soula. No posse de più che coscita percheche me stence tant da cogner me n jir te let sfenida. Ence do che vae a proveder son desfata magari percheche é rejonà con dotrei persones che le me à domanà zeche. Fae fadìa enscinamai a tor l companaso al banch e tole i scialames ja fac ite pur de no cogner comunichèr…

Doi domanes. Me piajessa saer coche te ne veides, bel foradret, toa vijion de nos da to mond enfora e seconda domana, se tu peisse de esser soula te chesta solentum.

Ge veide i etres desché persones da studièr, a outes mingol limitèdes, se posse l dir. Ei, voi dir che i descorsc che la jent fèsc se pel i fèr ence demò con mie “catalogh”, no te te fales. Gé vive la maor pèrt del temp con jent desche gé, ajache state con mi fies che i é desche gé e chest l’é mie mond.

Ence tie om?

Mie om l’é nosc gran mistèr, l ne vel bel sora vigne roba e l ne capesc… semper de manco! (e la se grigna, ndr). Chesta te la conte. Gé con el posse esser me enstessa, beleche semper, donca canche rejone no vèrde che ora che l’é e vae inant, inant… l’auter di rejonèe de politica e vedee che el l se aessa trat ju de fenestra. L me l’à ence dit: ma no veiste? te sèl che sie enteressà? Emben, gé g’é dit: vèrda che l 90% de la robes che te dis tu a mi no le me enteressa e te scoute istesc, donca empèra ence tu a me scutèr. L se n’à abù mingol empermèl (la grigna bel fort, ndr.)

Ma chest ge sozet pa a duta la cobies!

… dapò a ve vardèr, da na pèrt proe ence mingol de envidia, no proprio envidia, ma curgiosità tel veder persones che se chier per stèr ensema. Gé chest besen no l’é e volesse esser soula al mond, n’eremita sa mont te n bait, ma per l fat che é cernù de fèr familia no posse me l permeter, no amò. E ei, ge vèrde a la jent con curgiosità percheche no son bona de recognoscer l pensier, la reazions de la persones envers zeche che sozet, reazions che les é deldut desvalives da la mies. Gé la emozions no son bona de les gestir, no les recognosce te la persones, ma é emparà a entener belebon se na persona la é trista o zeche de auter. É fat l TOM, l test per mesurèr la teorìa de la ment; emben, gé é na teoria de la ment de na beza de diesc egn più o manco, però son semper aló che me cruzie de capir la situazions con mie catalogs. A outes fae fadìa a me tegnir, per te dir, se mer un de nonant’egn me vegn da dir “emben fossa stat ence ora” e magari l’era n parent strent. É emparà che dir e can l dir, ma cogne semper meter vèrda.

Él situazions olache no te cognes meter vèrda? Olache te es ledia de esser chel che te es?

A cèsa canche son soula, con mi fies e mie om.

E con tie père e tia mère?

Vèlch outa son me enstessa, vèlch outa no, perché no sé mai tant che i sà. Mia mère la é dut auter da me. A ela ge pièsc stèr anter la jent, ciacolèr, fèr robes dessema ai etres. La me chiama al telefon e la ciacola, ge lasce che la fae e endèna me fae mi mestieres. I mie i é stac contenc canche i à sapù che son Asperger, coscita amancol i à abù na responeta a coche son e ere. Percheche, se ades me sozede zeche che no stèsc ite te mie schemes, posse me n jir te let o jir te bagn olache é na picola scatola da desfèr. Da beza ere n’esplojion duc i dis e ic no i saea co fèr. La é jita inant coscita fin na certa età, fin canche no é fat l saut de l’imitazion. Fin che no te deventes atora de tia vita l’é senester da mac azetèr chesta condizion. Mi fies i à più sorì ajache gé posse medièr e ge ensegnèr la strategìes da durèr, cheles che ge é emparà tel temp.

Strategies che tia mère no aea…

Ei, i mie dijea de jir fora con chel o con chel’autra, roba che gé fajee fin che no é troà l’alcol che l’era l soul sistem per sozialisèr. Dapò é fat l saut e l’alcol no l me é più servì. Ades adertura son astemia.

Cotenc de egn aéeste pa canche ti es stata bona de fèr l saut?

Do la scoles mesènes.

E i ensegnanc?

Valgugn capìa e me dajea creta, e ge sgolèe. No fajee auter che lejer, ere delbon bona a scola e dapò però é cernù de no l’esser più.

Perché pa?

Perché coscita me sentìe più pèrt del grop. No ere più chela che saea de più, chela che canche l professor dijea A la saea ja la Z, e dapò é ence perdù atruz un an de scola per poder stèr adum coi etres. Dapò é ben capì che la mesa mesura l’é la mior mesura e però, ei, la mies l’é dut cernudes mingol certes. Ence chela de no voler me moscèr, de me mimetisèr, che nesciugn saesse mi pensieres. Nesciun saarà mai mi pensieres o chel che scrive o la vites paraleles che vive.

Chi este te chesta vites paraleles, che sort de verità èles pa?

Son semper gé, a outes son n esser n muie sozièl, son n capo de families n muie granes, na “leader”. L fat de esser na “leader” l’é n denominator de chesta mia vites paraleles. Colun che sie l’é l’argoment o la storia del moment che vèlch outa scrive e che nesciugn lejarà mai, é 25 password da passèr per ruèr enscin aló.

Chel él che no te ves che se vegne a saer? La stories? Tie esser?

L fat che aló son a nut, aló son delbon me enstessa.

Pèisseste che no sie meso che zachei posse te capir?

L’é empossibol, ei, empossibol. Son fora da vesc criteries de letura. Son più cinica per ejempie, trop più cinica, ence te la realtà son coscita e mingol l dae a veder, ma te mie monds son n muie più cinica… Ge é na gran pascion per l “black humor”, ence estrem, chest l spartesce con mie om. Però ence el vèlch outa l me disc: ma no te sèl mingol ejagerà? E enveze ge me é grignà desche n ciaredel e magari per na barzeleta che duc grigna ge grigne demò percheche se cogn grignèr.

E dapò cogne te responer a l’autra domana. Do aer fat mie percors (N. la se à fat recognoscer la sindrome de Asperger demò da pech temp, ndr.) me é scrit ite ai gropes su Facebook. Sion duc più bravi a scriver sul virtuèl. No sion de tropes, però sion, ejiston, e l’é enteressant veder canche a un de nos ge sozet zeche e l lo scrif, vegn fora che ge é ja sozedù a duc. Spartion la medema robes, beleche te la medema mesura.

Che él proprio la sindrome de Asperger?

L cervel l laora a na vida desferenta. Dapò l’é desvaliva teorìes sun chest. L’é chi che disc che sion cervìe en evoluzion. Gé die che son stata na evoluzion falèda, che sion n vèrech de la evoluzion che no l’é doventà, dapò, da zeche ora, vegnarà fora ence zeche da bon (la se grigna, ndr.)

N esperiment diste?

Ei, desche canche no aane l polesc de la mans desche ades… l cervel l cogn se enjignèr al davegnir, a dut chel che vegnarà, con duta chesta neva tecnologìes, dut chel che amò no saon.

Perché diste pa en esperiment nia garatà?

Nia garatà percheche aboncont l’umanità l’à de besen de sozialità per jit inant. Percheche l mond no l’à de besen de persones che stèsc dut l temp tedant al computer a fèr robes da soules, senza rejonèr con nesciugn, e dapò, no sé… aon n cervel desferent e ence senester da capir. Per ejempie nos Asperger sion conscideré autistics ma la sorts de autism les pel esser tropes e de mesura desferenta, tel gran chèder de l’autism l’é ite ence i pedimenté. E ence ic va en tilt per la medema robes che jon nos. L’é mères de bec autistics che les se domana: ma co, no capesce, é portà mie fi te na boteiga e l’à dat fora da mat, no capesce. Chest tant me sozet ence a mi (la persones autistiches les à i sensc n muie svilupé, ndr.). Gé é la fortuna che i rumores forc no i me dèsc massa festidech, scoute adertura musega metal, ma chest fèsc pèrt de mi interesc “assorbenc”.

Spiegheste coscita ence i afec e l’amor per tie compagn?

Ei, ence se l’é da dir che ence chesta emozions les é desferentes da cheles che pel proèr na persona normala. Gé e el sion leé da tropa robes, ma tropa robes el no l pel les fèr co me. Se l me disc zeche de romantich l pel se fèr su la valisc en chela medema dì.

Che te fajel piajer che l te die?

I compliments no i me pièsc, stente debel a i capir. Ence se no i vegn da el. Per ejempie me pièsc se i me disc che é fat n bel lurier ma me é sozedù che na tousa me à dit “dea del lurier” e gé son jita fora de cef, tant da pissèr da no lurèr più per ela.

Co éla, èste sentù faus l compliment?

Na, gé veide per chèdres, fegures, e per me la dea l’é na statua… e gé no capesce, dut chiò. Però posse azetèr compliments sun mie fies e seghitasse a i domanèr (la se grigna, ndr.).

Se tie om te porta i fiores?

Naa, chi l pel i portèr te cortina! Però mie esser romantich l m’é vegnù fora con mie fi più pìcol, con el m’é vegnù fora l douc e canche el l me porta i fiores, fae sauc de legreza.

Che èl pa fat chest pìcol per orir chest usc?

El l’é chel che à più de besen de me e chel che à più problemes anter nos trei. E donca son più leèda a el percheche l cogne didèr de più. El con me l’é n picol om, l’é bon de se orir e l’é bon de l fèr demò con me, ence trop, e enlouta l lasce fèr e lasce ence che l me petolee e gé petolee el. Se l se n va per doi dis l me mencia neto su la pel. El l’é me, e con me l’é bon de afrontèr l mond.

Che él che ve desferenziea vo trei?

Gé e mie fi gran sion valives te dut. Ge sé chel che l peissa e vizeversa. Col pìcol l’é na gran desferenza. Aon duc l medemo modo de pissèr (per chèdres, fegures, imajes), ma gé e l gran sion Asperger e enveze l pìcol no l’é demò Asperger. El l stenta a se verjer, l refuda l mond de la relazions, l stajessa delvers demò enstes ence se ades l scomenza a sentir l besegn di etres. Aon duc trei la medema vida de pissèr ma nos doi sion più sozièi respet al pìcol. Peissete che l ge à dit “vàtene” a n om su la coriera bele pech do che l’aea emparà a dir la parola “mama”. E dapò el l’à ence de autra robes. Gé e l gran no aon “comorbilità”, vel dir che no sion conscidré “malé”, e donca no aon de besegn de terapìes. El enveze scì. El l’é ence dislessich e chest fèsc vegnir fora de etres problemes. Per l rest se troon benon. Ge sé che el l disc certa robes percheche chela l’é sia stereotipìa (schem comportamentèl ripetitif e rigorous, ndr) che vèlch outa l fèsc delbon da grignèr…

Él eles Asperger che à abù suzes te la vita?

Fora che Temple Grandin, che l’é n’autorità ti studies che vèrda l’autism, les é zis peces la eles bones de vegnir fora. La eles, respet ai omegn, les se adatea trop de più, les à na capazità de mimetism maora, che les à bele da ite de sé per poder aer fies e familia. Somea che sie vèlch scritora autistica**, ma se fèsc demò ipoteses. I omegn vegn fora de più percheche i à manco spirit de adatament e i à l mimetism manco svelupà.

Segur te ès let n grumon de robes dintornvìa l’autism. Él libres che te à didà?

É let n muie de Oliver Sacks e n muie de libres che me à didà a rejer la situazion con mi fies, però chi olache me é troà ite al cent per cent l’é chi de Temple Grandin. Ela l’à na sort de autism piutost forta e la é stata bona de l contèr e de scriver chel che sion.

Coluns libres ge conseàsseste pa a la mères che à fies autistics?

Cognoscer “Il cervello autistico” de Temple Grandin l’é fondamentèl. Veide mères che no à nience la basa per entener la reazions de si fies e chest liber l deida trop. Gé dijesse de lejer libres scric da persones autistiches che les vegn defenides “a aut funzionament” e no chi scric da autistics con pedimenc grieves che scrif co la gàbola de la comunicazion didèda. L’é proà scientificamenter che l’é na gàbola, purampò l’é ence i libres più lec. Duta chela stories che sion seré ite desche te na perjon … no sion seré ite da nesciuna man! Ve conseee, en cont de chest, de ge vardèr al film “Il segreto di pulce”.

Él zeche che ve fèsc stèr miec?

I volea ne empienir de medejines per i dejèjes psichiatrics, ma per fortuna con nos chesta sort de medejines no garata, anzi, la maor pèrt les fèsc n “efet parados”. N muie de femenes les rua da vèlch ora a aer momenc de gran deprescion e chesta medejines no les à fazion. La scienza à cognù azetèr l fat che la pel fèr pech o nia per ne didèr. Per nos l’é tessech ence la psicologìa o la psicoanalisa. Fosc, ei, chel che funzionea l’é la psicologìa del comportament, che perauter gé no voi tor su con mi fies, ajache, ei, la funzionea ma i bec no l’é cians che cor per n os. Ge é abù la fortuna de troèr n dotor che me à fat l test de l’autism da grana e l’é stat n colp de fortuna perché per solit ai gregn no i ge li fèsc. I te disc: te es ruèda fin chiò, no te pes esser autistica.

E tu, co èste fat a “ruèr fin chiò”?

Con mia capazità de mimetism, de me adatèr al mond.

Se podessa seghitèr per ores a rejonèr con N. Del percheche no la met a la leta sia esperienza. Percheche, la disc, ge vel se meter a studièr delvers, che de jent che ven fum n’é teis stroz. De sie passèr la net a studièr strategìes e strumenc per didèr si fies a scola, de sie sistem de viver “col timer” a na vida che vigne roba da fèr l’à n temp e te chest la cogn stèr ite. Del contèr e memorisèr dut chel che la veit, te n orden e te categorìes stabilides dant fora. Un mond fascinant, senester fin che se vel (soraldut per cogner se adatèr a viver te n mond olache la maor pèrt à n auter funzionament del pensier), ma segur originèl e rich da marevea. Ne saessa zis bel che N. la verjesa n blog acioche podassane cognoscer sie mond e olache podassane se scontrèr, ajache l confin che defenesc chel che l’é l pensier “normal” o “nia normal” l’é semper più sfumà. E fosc l’à rejon N. canche la disc che sion cervìe en evoluzion…

*La sindrome de Asperger la é conscidrèda da la medejina n “dejèje pervasif del svelup”. L vegn tout ite tel chèder de l’autism ma no l’à la dificoltèdes de chest en cont de inteligenza, ferstont e autonomìa. La persones Asperger (Asperger l’era l dotor che aea studià chesta persones tel Nefcent) les fèsc fadìa a stèr anter la jent, les à modìe de comportament stereotipé e ativitèdes e enteresc limité.

**Pec dis do l’intervista l’é vegnù fora l liber “Il tuo sguardo illumina il mondo” de Susanna Tamaro olache la rejona proprio de si vita con la sindrome de Asperger.

Autora

Olimpia Rasom
Redadora

Cresciuda te Fascia, vive a Busan con chi de ciasa. Me piasc scriver de fémenes, contar sia stories, cognoscer sia vites. Da canche é scomenzà mia enrescida per l dotorat su la eles ladines, no é più lascià lò de scriver con eles. Mete adum ence documentars e reportage per la tv, no demò su la fémenes, e mete a jir picola enrescides e evenc.

Nata e cresciuta in val di Fassa, ora vivo a Bolzano ... >>