O Marmolèda che canche l soreie / te corona con sie raes / ties reina / e onor te cogn dèr ogni mont.” Con chesta paroles scomenza na veia ciantia popolèra, paroles che desmostra la gran amirazion che la Marmolèda, mont sìmbol de la Dolomites, soscedea da semper te la jent. N mont che, con sia parbuda maestousa e sia bela ponta biencia che se veit jà da dalenc, s’à vadagnà l sorainom de “Reìna de la Dolomites”. E tanche ogne reìna ence la Marmolèda se la troa te lejendes e contìes, tanche chela che ne conta de coche s’à formà sia giaces: “Madona de la Neif en ca / Madona de la Neif en la / l’é bon che mie fegn l’é te tobià / e i etres i l’à amò te pra.” Coscita ciantèa na veia sun Fedaa, contenta de aer menà dut l fegn te tobià, canche enveze chel di etres l’era amò te pra. L’aea fenì de restelèr enveze che jir te paìsc a messa la dì de la Madona de la Neif, ai cinch de aost. Ma l Segnoredio, per la ciastièr, l’aea manà jù dal ciel tanta de chela neif da la sepolir con dut so fegn, e da enlouta, sun Marmolèda, la giacia e la neif no les é più se n jites. Ma de segur la fegura più emportanta leèda a la Marmolèda l’é la bela Conturina. Chesta contìa la é stata tramanèda per secoi da la jent che jìa su la mont de Fedaa a fèr fegn e che, coscita i conta, la sentìa la mestia e doucia ousc de la pera Conturina che ciantèa sia desperazion. Demò n jon con so amor l’aessa podù la librèr dal rie strionament, ma el é ruà massa tèrt e Conturina la é destinèda a restèr arbandonèda colassù tel mont de mèrmol che sarà per semper sia soula consolazion: “Marmolèda, o Marmolèda / coscì auta e scì lucenta / a te veder no me spaenta / più pissèr a mie destin. / Son semper più enamorèda / de l’eterna tia beleza / te sarès mia contenteza / duc i secoi, zenza fin.”

L’otcent: rua i prumes alpinisć e schiadores
La Marmolèda l’é n mont rich de tradizion populèra, ma ence de tradizion turistica ajache chiò à sia reijes l turism dolomitich. Sobito dò i geologhes, che per prumes é rué te Fascia con l zil de studièr la “crepes spavides”, te l’otcent scomenza a ruèr te val ence i prumes alpinisć. Jà del 1802 e del 1856 vegn fat i prumes tentatives, jic mèl, de ruèr su la ponta de la Reìna; del 1860 doi alpinisć ingleisc, John Ball e John Birkbeck, ensema al menacrep da Chamonix Victor Tairraz, é bogn de ruèr per la pruma outa sun Ponta Roca. Ma sarà demò ai 28 de setember del 1864 che l joen alpinist da Viena Paul Grohmann, ensema ai doi frèdes menacrepes da Cortina Angelo e Fulgenzio Dimai, arjonc per la pruma outa la ponta più auta de duta la Dolomites, Ponta Penìa, a 3343 metres. Vèlch an più tèrt sarà na fémena, l’ingleisa Beatrice Tomasson, ensema ai doi menacrepes da Primier Michele Bettega e Bortolo Zagonel, la pruma a se fidèr su per l parei sud de la Marmolèda. L’é stat donca i ardii pionieres del alpinism dolomitich a ge dèr l prum sbunf al moviment turistich de la Dolomites, ma ence i engaissé de schi no i met n pez a descorir nesc monts: pèr che i prumes schiadores, con sia doi brees de legn, ciuzé de curam e guants de lèna, sie rué sun Marmolèda jà entorn al 1910. No l’é donca da se fèr na marevea se i prumes refuges te chest raion é stac fac sù proprio te pian de Fedaa, chel gran pian ai piesc de la Marmolèda, n’outa pèscol per la feides - da chiò so inom. Chest l’era l pont mior per fèr sù n post olache alpinisć e schiadores podea troèr da dormir e da magnèr. Anchecondì de pian de Fedaa no resta n muie da veder, ajache l’é béleche dut corì da l’èga de la diga fata sù ti egn cincanta, ma fin enlouta l pian l’era n gran pra pien de fiores, erbes e tobié olache passèa fora permez l Ru Tort, n picol ruf che scomenzèa aló dal lech naturèl (che se pel veder amò anchecondì junfon la diga) e che, ensema a l’èga che vegnìa fora da la giaces de la Marmolèda, jia a formèr la Veisc. Te anter i prumes refuges, fac su entorn a la fin del otcent e i prumes del nefcent, chi più da nonzech l’é l Refuge Venezia, fat sù da la SAT del 1908 davejin al Jouf de Fedaa, e l Refuge Bamberg, fat sù dal D.Ö.A.V. (Deutsches und Österreichisches Alpenverein = club alpin austro-todesch) olache anchecondì l’é l Refuge Castiglioni.

La Gran Vera
De chisc prumes refuges no resta più nia: i é stac desdruc dal fech endèna la pruma vera, chela vera che à mudà per semper la vita te Fascia, no demò dal pont de veduda politich. La Marmolèda, per via de sia posizion strategica anter l’Imper Austro-Ungarich e l Regn de la Tèlia, te chisc egn la doventa teater de vera. Per béleche trei egn sudé taliegn e austriacs, che fin enlouta i s’aea troà su per la crepes e la giaces de la Marmolèda vidé da la medema pascion per jir sa mont, i s’à troà, fora de n bel seren, a cogner se copèr per defener i confins de la “Heimat”. Ma colassù la maor pèrt de ic é morc soraldut per la grieves condizions de vita: l freit e la levines à copà ju più jent che i schiopes. Fosc i più fortuné, se de fortuna se pel rejonèr, l’é stat amò i austriacs, che à podù se parèr dal freit e da la levines te la “Eisstadt”, la zità de giacia ciavèda fora tel cher de la Marmolèda, n projet pissà fora dal tenent Leo Handl a cef de la trupes austriaches.

L nonzech turistich de la Marmolèda se slèria fora
Ti grieves egn dò la gran vera, pian pian scomenza endò a se descedèr fora chel mìngol de moviment turistich che aea moet si prumes vèresc jà dant dal 1915. Ensema a la jent da Penìa, che sun pian de Fedaa aea i pré e che d’istà jìa colassù a seèr, sù per i vièi che mena sun Marmolèda scomenza endò a s’enarloèr ence i prumes sciori. Lodovico Dantone Brach da Dèlba l’é un di prumes a se n’adèr de chest moviment, e entorn a la fin di egn vint l scomenza a fèr sù l Refuge Fedaia. Canche del trenta l refuge é fenì, l se trapina colassù ensema a sia fémena Rosina e ai bec ajache a la gestion de la neva atività envièda via cogn tor pèrt duta la familia. Lodovico Brach doventa ence menacrep per poder se meter a la leta de chi sciori che vel se goder la beleza de la Marmolèda amò più davejin. Enlouta i era n muie i omegn che, per scioldi o per pascion, scomenzèa via chest lurier nasciù ofizialmenter jà del 1871 canche fora Dìspruch l’era stat metù ju l prum regolament provinzièl. Jà enlouta i menacrepes fascegn, che lurèa sibie per la sociazion de menacrepes “Deutscher und Österreichischer Alpenverein“ che per la SAT, la Sozietà di Alpinisć Trentins, cognea dèr ju l’inom al giudizie de Vich o al capitan de Cavaleis se i volea lurèr. Entorn a la metà di egn trenta ence l CAI capesc che la situazion é dò a mudèr e del 1935 l ge dèsc l’encèria a l’enjegner da Cortina Giulio Apollonio de fèr su, soravìa la roìnes del veie Bambergerhaus desdrut dal fech endèna la pruma vera, n nef refuge che arà inom “Refuge Marmolada” conscidrà na “perla” te anter la costruzions da mont e un di refuges storics de la Marmolèda. L feruscol moviment turistich di egn’30 scomenza a slarièr fora l nonzech de la Marmolèda no demò te la Tèlia ma ence a la foresta. “Migliaia e migliaia sono gli appassionati che da ogni contrada d’Europa convergono alla Marmolada – scrivea del 1937 Ettore Castiglioni – attratti dalla fama e dal fascino della Regina delle Dolomiti e non passa giorno di buon tempo in cui non si veda il ghiacciaio formicolare di lunghe file di sciatori che si snodano agili e veloci in curve e controcurve, quasi eleganti arabeschi o figurazioni di danza”. E dut chest enceben che ruèr colassù no l’era nia del dut sorì. N’outa rué ta Cianacei se cognea se trapinèr fin te Ciamp Trujan da olache partìa l vièl che portèa sun Fedaa. N’outa rué colassù se se loghèa jù te refuge per la net e la dì dò se levèa bonorenta per jir sa mont: se partìa coi schi te man e dò aer sfondrà te metres de neif entria, se se tirèa ite i schi e permò dò ores de gran fadìa se ruèa sunsom. No l’é donca da se fèr na marevea se la “Direttissima”, la garejèda più de nonzech de enlouta, é nasciuda apontin su la neives de la Marmolèda del 1932. I atlec partìa da Ponta Roca e i ruèa fin jun pian de Fedaa: Hans Noelke, l’austriach che à vent la pruma edizion, l ge à metù nef menuc per corir i 1240 metres de dislivel pur jian dut dret. Vittorio Chierroni, Hans Steger, Zeno Colò e Paula Wiesinger à tout pèrt più che n’outa a la garejèda e à donca scrit na piata emportanta de la storia de la Marmolèda.

L nef sbunf dò la seconda vera e l prum impiant portamont de la Tèlia
Canche del 1939 crepa fora la seconda vera dut chest jir e vegnir de jent se chieta mìngol jù, ma jà del 1943 i prumes sciori, e adertura vèlch sudà american, se scrif ite tel liber di ghesć del Refuge Marmolada che, dò la vera, l ciapa l’inom de “Rifugio Ettore Castiglioni alla Marmolada”. Sobito dò la vera taca endò a ruèr jent e i fascegn se dèsc la mans dintorn per scomenzèr endodanef. Se pel zenz’auter dir che la Marmolèda, amàncol fin canche ence te val à scomenzà a se mever zeche, é stata un di lesc turistics più famousc de la Dolomites che per egn ge à dat da magnèr a n muie de fascegn. Enveze che cogner se n jir fora de val per poder se vadagnèr zeche, descheche aea fat si giaves, te chisc egn tousc e touses troa da lurèr sun Marmolèda. N muie de fenc, soraldut da Dèlba e Penìa, se vadagna da viver fajan i portadores: i cogn portèr sù su la spales dut chel che l’é debesegn per manèr inant l’endrez, sessaben ence i pacasc con schi e bachec, cordes e prossaches di sciori. Bel pian l nonzech de la Marmolèda se slèria fora e a la scomenzadives de la jent del post se jonta ence operatores da foradecà. L’é defati Graffer da Trent che del 1947 se peissa de fèr su l prum lift portamont de la Tèlia. Ensema ai lurieres de la sentadoa, che da Fedaa porta sun Pian di Fiacons, va inant ence chi del refuge sunsom, fat sù da Romano Parmesani. Ma la dì dant de orir, ai 7 de dezember del 1947, da la Marmolèda vegn jù tant na gran levina che sepolesc l refuge e porta demez na pèrt de la sentadoa. De gra a la tecnologìa ruèda ence sun Marmolèda l nef moviment turistich di egn caranta e cincanta ciapa n gran sbunf. Sun Fedaa scomenza adertura a ruèr jent da foradecà che à sentù che colassù l’é sorì ciapèr da lurèr.

La diga”
Ma te chisc egn i tempes modergn rua sun Fedaa ence con n’autra scomenzadiva de foresć: del 1948/49 met man i lurieres per la costruzion de la diga che vegn pissèda e projetèda da la SADE, la sozietà Adriatica di Elettricità, na sozietà privata de Unejia fondèda del 1905 da Giuseppe Volpi, pionier del svilup industrièl del Veneto e president de la sozietà fin al 1944, canche l vegn serà via e l sciampa te la Svizra per sie leames col goern fascist. Zenza che zachei se remesce contra l projet, i lurieres scomenza entorn al 1948, canche vegn fat la pruma proes per veder se l teren tegn fora l’èga. I pré de pian de Fedaa vegn compré ju per na piva de tabach: Massimiliano Salvador da Penìa l ciapa “esatte lire 1446” per 4891 metres cadrac de pèscol, coche se lec sul contrat firmà a Ègort ai 27 de setember del 1949. Per capir cotant che valea enlouta 1446 lires, bèsta se pissèr che la chèrta da bol del contrat era stata paèda 60 lires. L Refuge Fedaia de Lodovico Brach vegn sproprià, fat fora e doventa la senta di ofizies de la SADE. Del 1955 i lurieres vegn adertura touc jù dal regist e ator gherdener Luis Trenker per sie film “Il prigioniero della montagna”. Canche del 1956 rua l’ora de molèr ite l’èga per la pruma outa, i tobié de pian de Fedaa vegn trac ju e l veie Refuge Fedaia vegn fat sutèr. Anchecondì de chel bel pian pien de fiores no se veit più nia: sie pré é sot la èghes de chel gran lech artifizièl, che no demò à mudà per semper la parbuda del pian ma che, a dir de zachei, à segnà per semper l destin de la Marmolèda. Enceben che chel gran mur de la diga fae encomai pèrt del nef paesaje de la Marmolèda e enceben che la strèda da Ciamp Trujan no sie amò fenida, l’é amò n gran muie de turisć che, a la fin di egn cincanta e al scomenz di egn sessanta, rua sun Fedaa da ogne piz e cianton del mondo per mirèr la Reìna de la Dolomites, coche desmostra l gran numer de firmes ti registres di ghesć del Refuge Marmolada.

La scola de schi, la “tre-tre” e Mario Iori “Marmolada”
Del 1961 Rinaldo Cigolla, ensema a etres, met sù la pruma scola de schi da d’istà. Per chesta sia neva atività l’à debesegn de n auter impiant portamont e l prum skilift de la Marmolèda vegn fat sù davejin a la sentadoa de Graffer. Ma ti egn sessanta l nonzech de la Marmolèda é de segur leà ence a n gran personaje che à scrit n’autra piata emportanta de la storia de la Reìna: Mario Jori de Caciù. Mario “Marmolada”, coche l volea che i ge dijesse, l’é nasciù a Cianacei del 1919 e sobito dò la vera l va sun Fedaa per didèr l père Francesco - maester de scola e alpinist - e la mère Oliva Rizzi da Pera a manèr inant l Refuge Marmolada. Del 1960, a la mort del père e de la mère, Mario ciapa te man la gestion del refuge. L’é egn de gran lurier sun Marmolèda; se pèrla de adertura passa mile persones ogne an. Mario, l “gran stramp”, coche ge dijea chi che lo cognoscea delvers, l’era na persona scì zavareousa, ma tel medemo temp sensìbola e de gran cultura. N fon leam de amicizia l lo lea al scritor Dino Buzzati e al giornalist Indro Montanelli, che te chisc egn rua sun Fedaa béleche ogne istà. Ma sot l tet del Refuge Marmolada troa alberch ence l canzelist austriach Josef Klaus, l’ator talian Vittorio Gassman e l giornalist sportif Rolly Marchi, che restarà per semper leà a la familia Jori da n fon leam de amicizia. Rolly Marchi scomenza a ruèr sun Fedaa jà ti egn cincanta en ocajion de la “tre-tre” e del “Gigantissimo”, garejèdes de nonzech che enlouta porta dal lèrch no demò n grumon de atlec ma ence jent che vegn fin cassù a ge vardèr. Canche del 1971 vegn fenì la strèda che da Ciamp Trujan porta sun Fedaa, Mario se n va. “Me n vae, lasce l Refuge Castiglioni ajache no é nesciuna intenzion de fèr l’albergator; ajache strèdes e lifc portamont à robà l’ènema a mia mont, ajache no voi viver te anter cater mures che produsc demò scioldi” l’é stat sia paroles. I conta che l no vedea de bon eie la “magnarìa” che stajea vindedò l sfrutament economich del patrimonie naturèl de la Marmolèda e la costruzion de la strèda, che a so veder aessa portà colassù chela sort de turism che aessa roinà la Marmolèda e la val entrìa.

Dai egn ’70 fin anchecondì
Zachei disc che l turism ge à robà l’ènema a la Marmolèda. L svilup turistich de la Reìna di ùltimes dejenees l’é stat zenz’auter segnà da chela che n muie de jent chiama la “vera di confins”. Chest mont l’é semper stat n lech de confin; amò anchecondì sun Jouf de Fedaa se pel veder i térmegn, metui ju del 1778 per voler de la Kaiserin Maria Teresa, che segnèa l confin dant anter l Prinzipat Episcopal de Persenon e la Serenissima Repubblica de Unejia e dò anter l Tirol e l Veneto. La gran vera pèra demez i confins nazionèi e vèlch an più tèrt, dò la seconda vera, ma soraldut a partir dai egn setanta, la costion di confins vegn endò trata cà, chest’outa anter la provinzia de Trent e chela de Belun. L biteboi é jit inant per egn e per ruèr a na soluzion se se à emprevalù ence de la cultura del storich fascian Père Frumenzio Ghetta che é jit a tor cà veies documents. La beghes va inant fin del 2002 canche zacan vegn dezidù che la giaces de la Reìna les partegn al Comun de Cianacei, donca a la Provinzia de Trent. Ai 13 de mé del 2002 i raprejentanc de la Provinzies de Trent e Belun, de la Region Veneto e di Comuns de Cianacei e Rocia se troa per firmèr n “protocol de cordanza”, con chela de scomenzèr a lurèr a una per meter jù na lingia de scomenzadives e projec de svilup coordenà per valorisèr la Reìna dal pont de veduda ambientèl, storich, culturèl e turistich. Tol pèrt ence la sociazion per l stravardament de l’ambient Mountain Wilderness, cruzièda per l davegnir del giacion, la più gran resserva de èga de la Dolomites che se smendra ogne an de più. A la scomenzadives de la istituzions se jonta ence chela di privac: del 2003, declarà An Internazionèl de l’Èga, Aurelio Soraruf de Fanci da Penìa e Stefen dell’Antonio Monech da Moena met jù n projet de valorisazion e stravardament de la Marmolèda che à inom “Diversamente Marmolada”. En curt l projet perveit la costruzion de doi lifc, un che pèrt da la pèrt veneta de Fedaa e un da la pèrt fascèna per ruèr, duc doi, sun Ponta da les Unesc; da chiò na picola ferata, tras n tunel, porta fin sun Ponta Roca. La giaces de la Marmolèda, zenza più lifc a les roinèr, doventassa endodanef l paradis de chi che vel ruèr sun ponta coi schi d’alpinism ma ence di schiadores che aessa endò a la leta un di portoes più bie del raion dolomitich. Ma la costruzion de la neva forenadoa de Malga Ciapela à desfantà duc chisc bie ensomesc. I lurieres é scomenzé e jic inant enceben che la polemiches, soscedèdes soraldut da la costruzion del terzo toch de la forenadoa che da Serauta mena sun Ponta Roca, no les sie mai sturtèdes sù. La polemiches é states portèdes dant da Mountain Wilderness che à cusà la dita che aea te man i lurieres, la sozietà veneta Marmolada-Tofane, de aer piorà, con sie mesi che à grazà su la neif e lascià la giaca descorida, la jà grieva situazion del giacion.

Colun davegnir?
N muie de jent, soraldut te anter i fascegn, se domana percheche sul tegnir del Trentin l’é stat fat sù n lift, che no demò met a risech la soravivenza del giacion, ma che joa demò al Veneto canche, aldò del protocol de cordanza, la doi provinzies aessa cognù lurèr a una per dessegnèr fora n projet de svilup che aessa cognù portèr a na soluzion ence per i operatores del turism de la pèrt trentina del lech, che da egn i domana n aiut. Chesta situazion de desvalivanza del svilup turistich de la Reìna se palesa amò anchecondì: la strèda de Fedaa resta de spes serèda via per l’invern e l’é semper demanco la jent che va coi schi duran i veies e veiores “cestons” de Graffer, canche enveze da l’autra pèrt, via per dut l’invern, l’é n gran biteboi de schiadores che se emprevèl no demò di neves lifc ma ence del servije de eliski. Fin ades i projec de valorisazion e stravardament de la Reìna é resté demò sul papier. Colugn davegnir donca per noscia Reìna?